განათლებისა და მეცნიერების სამინისტროს ინიციატივით და განათლების ხარისხის განვითარების ეროვნული ცენტრის მხარდაჭერით, საქართველოს საქმიანი ვიზიტით ეწვია სამედიცინო განათლების მსოფლიო ფედერაციის პრეზიდენტი - პროფესორი დევიდ გორდონი და ამავე ორგანიზაციის ხელმძღვანელი შივონ ფიცპატრიკი.

5 აპრილს სამუშაო შეხვედრა გაიმართა განათლების ხარისხის განვითარების ეროვნულ ცენტრში, სადაც სტუმრები ცენტრის საქმიანობას გაეცნენ და სამედიცინო საგანმანათლებლო პროგრამების საერთაშორისო აკრედიტაციის პერსპექტივების შესახებ იმსჯელეს. საქართველოში მიღებულ სამედიცინო განათლებას 2023 წლიდან უნდა ჰქონდეს საერთაშორისო აღიარება. სამედიცინო პროგრამების აკრედიტაციის განმახორციელებელი ორგანიზაცია უნდა აკმაყოფილებდეს სამედიცინო განათლების მსოფლიო ფედერაციის სტანდარტებს. განათლების ხარისხის განვითარების ეროვნული ცენტრი გეგმავს მოიპოვოს ფედერაციის აღიარება, რაც საშუალებას მისცემს განახორციელოს სამედიცინო პროგრამების საერთაშორისო აკრედიტაცია როგორც საქართველოში, ასევე მის ფარგლებს გარეთ.