13 სექტემბერს გაეროს განვითარების პროგრამის ინიციატივით სსიპ განათლების ხარისხის განვითარების ეროვნული ცენტრის მიერ შვეიცარიულ გამომცემლობასთან (LMZ) თანამშრომლობით შემუშავებული სახელმძღვანელოების ვალიდაციის სემინარი გაიმართა. სემინარზე განხილული იყო სოფლის მეურნეობისა და სასურსათო ტექნოლოგიების მიმართულებით შექმნილი სასწავლო რესურსები პროფესიული სტუდენტებისათვის. შვეიცარიული გამომცემლობის, LMZ-ის ხელმძღვანელმა სემინარის მონაწილეებს გაუზიარა საგანმანათლებლო რესურსების შექმნის შვეიცარიული გამოცდილება და გაიმართა დისკუსია პროფესიული სახელმძღვანელოების შექმნის მეთოდოლოგიურ საკითხებზე.
„პროფესიული განათლების სპეციფიკაზე მორგებული სახელმძღვანელოები სოფლის მეურნეობისა და სასურსათო ტექნოლოგიების მიმართულებით საქართველოში წლებია არ შემუშავებულა და სისტემა აღნიშნული რესურსების დეფიციტს განიცდიდა. ეს რესურსები მნიშვნელოვნად შეუწყობს ხელს პროფესიული განათლების რეფორმის განხორციელებას“- განაცხადა სემინარზე პროფესიული განათლების ხარისხის უზრუნველყოფის სასმახურის უფროსმა კახაბერ ერაძემ.